Mirallas: Ég hélt að ég fengi rautt

Everton-maðurinn Kevin Mirallas þakkar fyrir að hafa ekki fengið rauða spjaldið í 3-3 jafntefli Everton og Liverpool á Goodison Park í ensku úrvalsdeildinni um helgina. Belginn telur að það hafi bjargað sér að þetta var leikur Merseyside-liðanna.

Kevin Mirallas braut illa á Luis Suarez snemma í leiknum þannig að takkaförin sáust greinilega í hnésbót Suarez. Phil Dowd tók sér langan tíma í að ákveða sig en lyfti síðan gula spjaldinu.

„Ég hélt fyrst eftir tæklinguna að ég fengi rautt spjald. Ég ætlaði að fara í boltann en fór í hné hans og baðst afsökunar um leið," sagði Kevin Mirallas sem skoraði fyrsta mark Everton í leiknum og lagði síðan upp annað markið.

„Þetta var kannski í lagi af því að þetta var derby-leikur því það er alltaf leyft meira í slíkum leikjum. Það er mikil pressa á bæði leikmönnum og stuðningsmönnum í slíkum leikjum og það eru líka miklu fleiri tæklingar," sagði Mirallas.

Luis Suarez fann verulega fyrir tæklingu Mirallas og haltraði fram að hálfleik. Brendan Rodgers, knattspyrnustjóri Liverpool, var mjög ósáttur eftir leik og varpaði þeirri spurningu fram um hvaða spjald hefði farið á loft ef hlutverkin hefðu snúist við.