Liverpool-stjarnan táraðist í franska sjónvarpinu

Mamadou Sakho, leikmaður Liverpool, var hetja Frakka þegar þeir tryggðu sér sæti á HM í Brasilíu. Mamadou Sakho skoraði þá í 3-0 sigri í seinni leiknum á móti Úkraínu en franska landsliðið vann þar með samanlagt 3-2.

FIFA skráði tvö marka Frakka á Sakho en þegar betur er að gáð kemur í ljós að annað markanna var greinilegt sjálfsmark.

Mamadou Sakho var í viðtali í franska sjónvarpinu á dögunum og þar táraðist kappinn þegar hann þakkaði látnum föður sínum fyrir hversu langt hann hefur náð í boltanum.  

„Hann hefði verið stoltur af mér í dag," sagði Mamadou Sakho en faðir hans lést þegar hann var aðeins 14 ára gamall.

„Það skipti öllu fyrir mig að verða atvinnumaður í fótbolta. Þegar faðir minn veiktist þá sagði hann við mig: Það er kominn tími fyrir þig að taka ábyrgð á fjölskyldunni," sagði Sakho og bætti við: „Ég þroskaðist mikið við þetta. Ég setti alltaf markið hærra en vinirnir og ég var staðráðinn í því að ná langt. Þessi tár voru fyrir föður minn," sagði Sakho.

Mamadou Sakho spilaði ekki fyrri leikinn á móti Úkraínu sem tapaðist 0-2 en kom inn í liðið fyrir leikinn í París vegna þess að Arsenal-maðurinn Laurent Koscielny tók út leikbann.

Mamadou Sakho kom til Liverpool frá Paris SG í sumar en hann yfirgaf liðið þegar PSG keypti hinn 19 ára Brasilíumann Marquinhos.

Mamadou Sakho er búinn að spila sjö leiki í ensku úrvalsdeildinni með Liverpool en var á bekknum í bæði síðasta leik fyrir landsleikjahléið sem og í fyrsta leiknum eftir það sem var 3-3 jafnteflið á móti Everton á Goodison Park um síðustu helgi.