Flamini kominn í stríð við búningastjóra Arsenal

Mathieu Flamini er búinn að gera allt vitlaust hjá Arsenal eftir að hann gerðist svo djarfur að klippa ermarnar af treyjunni sinni. Þetta er í annað sinn sem hann gerir það.

Það er rík hefð fyrir því hjá Arsenal að allir leikmenn spili í treyjum með sömu ermasídd. Það er fyrirliði liðsins sem tekur ákvörðun um treyjur hverju sinni.

Fyrst klippti hann ermarnar af fyrir leikinn gegn Man. Utd á dögunum. Búningastjóri félagsins ku hafa brjálast út í leikmanninn og rifust þeir víst heiftarlega.

Sjálfur stjórinn, Arsene Wenger, tjáði sig um málið eftir að Flamini endurtók leikinn í Meistaradeildinni í gær.

"Ég er ekki hrifinn af þessu og hann mun ekki gera þetta aftur. Það er hefð fyrir þessu og ég er hissa á ákvörðun Flamini. Við viljum ekki sjá þetta," sagði Wenger.

Flamini sjálfur neitar samt að hlusta á Wenger og búningastjórann.

"Ég hef spilað á meðal þeirra bestu í tíu ár og ég vil spila í stutterma treyjum," sagði miðjumaðurinn.

Kunnugir segja að Flamini sé kominn í stríð sem hann geti aldrei unnið. Það síðasta sem menn eigi að gera sé að fara í stríð við búningastjórann. Hann muni alltaf geta hefnt sín.