Týndi sonurinn snýr aftur heim | Upphitun fyrir laugardaginn í enska

Loic Remy reynir að koma Newcastle í toppbaráttu deildarinnar og Everton reynir að komast af án Leighton Baines.

Sex leikir fara fram í ensku úrvalsdeildinni í knattspyrnu á morgun. Fimm leikjanna hefjast klukkan 15 en síðdegisleikurinn er viðureign Newcastle og West Brom klukkan 17.30.

Norwich - Crystal Palace

Anthony Pilkington er frá vegna meiðsla hjá heimamönnum sem verða þess heiðurs aðnjótandi að fá Tony Pulis í heimsókn í sínum fyrsta leik sem stjóri Palace.

Cardiff - Arsenal

Eftir 2-2 jafntefli Cardiff gegn Manchester United á heimavelli um liðna helgi eru Aron Einar Gunnarsson og félagar fullir sjálfstrausts. Fjögur stig af sex mögulegum heima gegn Manchester-liðunum er ekki amalegur árangur.

Aaron Ramsey snýr aftur á sinn gamla heimavöll í Wales og fær vafalítið blíðar móttökur. Arsenal hefur fjögurra stiga forskot á toppnum eftir tvö mörk Olivier Giroud í 2-0 sigri á Southampton um síðustu helgi.

Aston Villa - Sunderland

Villa menn náðu að krækja í stig í 2-2 jafntefli gegn West Brom eftir að hafa lent 2-0 undri í síðasta leik. Sunderland lá 2-0 gegn Stoke þar sem Wes Brown fékk ósanngjarnt rautt spjald. Hann þarf ekki að taka út leikbann vegna spjaldsins.

Everton - Stoke

Þeir bláklæddu verða án Leighton Baines sem verður frá út árið vegna meiðsla á fæti í 3-3 jafnteflinu gegn Liverpool. Stoke hefur aðeins tapað einum af síðustu fimm leikjum sínum.

West Ham - Fulham

Fróðlegt verður að sjá hvort Sam Allardyce spili enn einn leikinn framherjalaus eða gefi Carlton Cole tækifæri í fremstu víglínu.

Newcastle - West Brom

Loic Remy hefur skorað átta mörk í tíu leikjum. Newcastle getur komist í 4. sæti deildarinnar með sigri og hagstæðum úrslitum úr öðrum leikjum. West Brom hefur aðeins tapað einum af síðustu níu leikjum sínum.

Upphitunarmyndband fyrir laugardagsleikina má sjá hér að ofan.