Vonast eftir eigin gullkynslóð

Arsene Wenger vonar að ungir leikmenn Arsenal geti náð að leika eftir árangur gullárgangs Manchester United.

Arsenal sem situr á toppi ensku úrvalsdeildarinnar fyrir leiki dagsins mætir Manchester United á Old Trafford í stórleik dagsins. Eftir tap í fyrstu umferð gegn Aston Villa á heimavelli hafa leikmenn Arsenal heldur betur snúið taflinu við og ekki tapað í síðustu níu leikjum í deildinni.

Nýlega var tilkynnt að það stæði til að gefa út heimildarmynd sem fjallaði um 1992 árganginn hjá Manchester United þegar Gary og Phil Neville, David Beckham, Paul Scholes, Ryan Giggs og Nicky Butt komu fram á sjónarsviðið. Wenger er vongóður að ungir leikmenn Arsenal líkt og Theo Walcott, Jack Wilshere, Aaron Ramsey, Kieran Gibbs, Wojciech Szczesny og Alex Oxlade-Chamberlain geti náð svipuðum árangri.

„Þetta var alveg einstakt, að fá svona marga góða leikmenn sem eru tilbúnir að berjast fyrir klúbbinn á sama tíma. Að fá slíka leikmenn úr unglingastarfinu er ekki aðeins mikilvægt fyrir klúbbinn heldur er mikilvægt fyrir stuðningsmennina að sjá að leikmenn leggi sig fram fyrir klúbbinn. Þessi hópur er jafn hæfileikaríkur og hópurinn sem kom fram árið 1992 og núna verðum við að reyna að nýta okkur það,"

Leikur Manchester United og Arsenal er í beinni útsendingu á Stöð 2 Sport 2 og Stöð 2 Sport HD og hefst klukkan 16:10.