Mourinho: Ég gerði ekkert sérstakt fyrir Torres

Jose Mourinho, knattspyrnustjóri Chelsea, ætlar ekki að taka heiðurinn af því að spænski framherjinn Fernando Torres er farinn að líkjast þeim leikmanni sem Chelsea borgaði 50 milljón punda fyrir á sínum tíma.

Fernando Torres er búinn að skora þrjú mörk í síðustu tveimur leikjum sínum og var frábær í 2-1 sigri á Manchester City í ensku úrvalsdeildinni um síðustu helgi.

Torres hefur oft gengið illa að halda sæti sínu í Chelsea-liðinu síðustu misseri og það var einnig þannig til að byrja með í vetur. Nú lítur aftur á móti út fyrir að hann sé kominn á flug.

„Hann er bara að gera sitt besta, hvort sem hann er maður leiksins eins og á móti Manchester City eða þegar hann er ekki maður leiksins, á bekknum eða kemur inná sem varamaður," sagði Jose Mourinho við Guardian.

„Ég endurtek að ég gerði ekkert sérstakt fyrir Torres. Ég geri bara það sem ég er vanur sem er að reyna að ná því besta út úr mínum leikmönnum en á venjulegan hátt. Það undir honum sjálfum komið að finna sína innri hvöt og leggja mikið á sig á hverjum degi," sagði Mourinho.

„Ég vil að Ferando nái stöðugleika og að hann hætti að hafa of miklar áhyggjur af því að þurfa að sanna sig. Hvort sem hann skorar eða ekki þá vil ég bara að hann vinni fyrir liðið," sagði Mourinho.

Fernando Torres skoraði sitt fyrsta mark í ensku úrvalsdeildinni á tímabilinu á móti Manhester City í síðasta leik og lagði þá einnig upp mark. Chelsea mætir Newcastle á útivelli í hádegisleiknum í dag. Torres skoraði síðasta í tveimur deildarleikjum í röð í október 2012.