Rosaleg vika framundan hjá Arsenal-liðinu

Arsenal fær Liverpool í heimsókn klukkan 17.30 í kvöld í stórleik helgarinnar í ensku úrvalsdeildinni í fótbolta en það er nóg af risaleikjum framundan á næstu dögum hjá lærisveinum Arsene Wenger.

Arsenal sækir Dortmund heim á miðvikudaginn í mjög mikilvægum leik í Meistaradeildinni og á sunndaginn eftir rúma viku er komið að leik við Manchester United á Old Trafford.

„Þetta er vissulega mikilvægur tími fyrir okkur en ég hef mikla trú á liðinu og er rólegur yfir þessu. Liðið mitt er tilbúið fyrir stóru leikina og þetta er möguleiki fyrir mína menn að sýna og sanna styrk sig. Ég hef trú á því að leikmennirnir grípi þetta tækifæri," sagði Arsene Wenger á blaðamannafundi fyrir leikinn á móti Liverpool.

„Ég lærði mikið um liðið þegar við spiluðum með bakið upp við vegg á síðustu leiktíð. Þá urðum við að vinna hvern einasta leik til að komast í Meistaradeildina. Ég hef því fulla vitneskju og styrk og vilja minna leikmanna. Við viljum berjast um titlana," sagði Wenger.

Arsenal hefur náð í 22 stig af 27 mögulegum í ensku úrvalsdeildinni á þessu tímabili og var með tveggja stiga forskot á Chelsea og Livepool fyrir umferð helgarinnar.