Mourinho: Við áttum skilið að tapa

Jose Mourinho, knattspyrnustjóri Chelsea, var ekki ánægður með sína menn sem töpuðu 0-2 á móti Newcastle í ensku úrvalsdeildinni í dag. Chelsea hefði komist á toppinn með sigri.

„Ég var ekki hrifinn af frammistöðunni og við áttum skilið að tapa leiknum. Við fengum nokkur góð færi til að ná jöfnunarmarkinu en þeir börðust meira en við og lögðu meira á sig í þessum leik. Newcastle var betra liðið á vellinum og átti skilið að vinna ef einhver átti það," sagði Jose Mourinho við BT Sport.

„Leikurinn var ekki krefjandi í fyrri hálfleiknum en við vorum ekki nægilega beittir í okkar leik. Við létum leikinn renna frá okkur og þá er alltaf hættulegt að fá á sig mark og tapa. Ég talaði um þetta í hálfleik en það dugði ekki," sagði Mourinho.

„Við þurfum ekki að tapa leik til að átta okkur á hversu jöfn enska úrvalsdeildin er. Það eru allir með í þessu kapphlaupi en ef Arsenal vinnur í dag þá nær liðið góðu forskoti. Ég var ekki hrifinn af mínu liði í dag," sagði Mourinho.