Rodgers gagnrýnir Atkinson

Brendan Rodgers þjálfari Liverpool var allt annað en sáttur við dómarann Martin Atkinson dómara vegna þess að mark Jordan Henderson fékk ekki að standa í leik Arsenal og Liverpool í ensku úrvalsdeildinni í gær.

Arsenal vann leikinn 2-0 en Henderson kom boltanum í netið í fyrri hálfleik og hefði jafnað metinn 1-1 ef Atkinson dómari hefði beytt hagnaðarreglunni og beðið með að spjalda Bacary Sagna fyrir brot á Luis Suarez.

„Þetta var slæm ákvörðun. Þú verður að láta leikinn ganga. Ef þetta er reglan þá er reglan ekki góð,“ sagði Rodgers um atvikið.

„Við biðjum leikmenn um að vera heiðarlegir, standa upp og leika í stað þess að velta sér á jörðinni. Ef þeir eru ekki beðnir um það gætu þeir velt sér um á jörðinni í von um að fiska gult spjald.

„Fjórði dómarinn útskýrði þetta fyrir mér og ég er vonsvikinn, svo ég segi ekki meira. Hann sagði þetta næsta skref leiksins, hann gaf gula spjaldið og gat aðeins gefið það á þessum tímapunkti.

„Mér fannst þetta röng ákvörðun því þú þarft að láta leikinn ganga. Þetta var snjallt hjá okkur og við hefðum átt að fá mark úr þessu,“ sagði Rodgers sem viðurkenndi einnig að Arsenal hafi verið betra liðið og átt sigurinn skilinn.