Hodgson horfir til Berahino

Talið er að Roy Hodgson þjálfari enska landsliðsins í fótbolta muni velja framherjan unga Saido Berahino í landsliðshóp sinn fyrir komandi æfingaleiki Englands í mánuðinum.

Berahino skoraði sjötta mark sitt í níu leikjum þegar hann skoraði fyrir West Brom um helgina. Þetta var annað mark hans í deildinni fyrir West Brom en hann hefur skorað fjögur mörk í deildarbikarnum.

Berahino hefur skoraði tíu mörk alls í haust fyrir unglingalandslið Englands og West Brom og horfir Hodgson hýru auga til framherjans tvítuga sem ekki á fast sæti í byrjunarliði West Brom.

Hodgson þekkir vel til leikmannsins frá því hann var stjóri West Brom og gæti  hann fengið tækifæri til að sýna sig í æfingaleikjum gegn Chile og Þýskalandi síðar í mánuðinum.

Berahino flutti með móður sinni frá stríðhrjáðu Burundi þegar hann var tíu ára gamall og hefur leikið fyrir öll unglingalandslið Englands frá U-16 til U-21.

Hann var fyrst valinn í U-21 árs liðið í september og hefur skorað fjögur mörk í þremur leikjum fyrir liðið.