Adebayor: Kemst ekki neðar

Emmanuel Adebayor framherji hjá enska úrvalsdeildarliðinu Tottenham segir að hann „komist ekki neðar“ eftir að hafa verið gjörsamlega frystur hjá félaginu í upphafi leiktíðar.

Hinn 29 ára gamli framherji hefur ekki leikið neitt fyrir Tottenham á leiktíðinni eftir að Andre Villas-Boas keypti Roberto Soldado á 26 milljónir punda í sumar.

Botninum var náð þegar Adebayor þurfti að æfa með unglingaliði Tottenham. „Ég hef reynt að halda í trúna en ég kemst ekki neðar. Ef ég færi neðar þá væri ég dauður,“ sagði Adebayor við breska götublaðið The Sun.

„Mér fannst ekki óþægilegt að æfa með varaliðinu, það sem mér fannst óþægilegt var þegar sjúkraþjálfarinn kom til að segja mér, einum af reyndari leikmönnum liðsins, að æfa með unglingaliðinu,“ sagði Adebayor.

Villas-Boas mun að öllum líkindum reyna að selja leikmanninn í janúar og er tyrkneska liðið Besiktas sagt hafa áhuga en Adebayor ætlar að berjast fyrir sæti sínu.

„Ég á þrjú ár eftir af samningnum mínum og ég fer ekki fet. Ég á óklárað verk hér.“