Rooney: Erum að læra á Moyes

Wayne Rooney, framherji Manchester United, telur að liðið sé að öðlast meira sjálfstraust eftir átta leiki í röð án taps í öllum keppnum.

David Moyes, knattspyrnustjóri United, tapaði þremur af fyrstu sex leikjum sínum í ensku úrvalsdeildinni á tímabilinu en Skotinn tók við liðinu fyrir tímabilið.

„Það var kominn upp alveg ný staða hjá liðinu með stjóra innanborð sem hafði kannski ekki alveg sömu sýn á leikinn og Alex Ferguson,“ sagði Rooney, en Ferguson hætti með United í vor eftir að hafa verið með liðið í 26 ár.

„Það er því undir okkur leikmönnunum komið að fara eftir skipunum stjórans og leika eins og hann vill að við gerum. Þetta var vissulega breyting fyrir okkur en menn eru að ná tökum á þessari leikaðferð og með því kemur ákveðið sjálfstraust.“