Liverpool fór illa með Fulham - Suárez með tvö mörk

Liverpool var í stórsókn frá fyrstu mínútu á móti Fulham í ensku úrvalsdeildinni í fótbolta í dag og vann á endanum mjög sannfarandi 4-0 sigur í leik liðanna á Anfield.

Úrúgvæmaðurinn Luis Suárez skoraði tvö mörk fyrir Liverpool í þessum leik og hefur þar með skorað átta mörk í sex deildarleikjum á leiktíðinni. Steven Gerrard átti frábæran leik og lagði upp þrjú marka Liverpool-liðsins.

Steven Gerrard lagði upp tvö fyrstu mörkin með frábærum sendingum, Fyrst skoraði Fernando Amorebieta í eigið mark eftir aukaspyrnu Gerrard og svo skoraði Martin Škrtel með þrumuskalla aðeins þremur mínútum síðar efir hornspyrnu Gerrard.

Luis Suárez skoraði þriðja markið á 36. mínútu eftir laglega stungusendingu frá Jordan Henderson inn í vítateiginn. Gerrard kom líka að undirbúningi marksins.

Liverpool byrjaði seinni hálfleikinn á því að skapa sér þrjú dauðafæri á fyrstu tveimur mínútum hálfleiksins, Suárez fékk tvö og Daniel Sturridge eitt.

Luis Suárez kom Liverpool í 4-0 á 54. mínútu eftir að Steven Gerrard vann boltanum og kom honum inn fyrir á Suárez.

Luis Suárez reyndi allt til þess að ná þrennunni en tókst ekki þrátt fyrir fjölmörg góð tækifæri. Maarten Stekelenburg átti góðan leik í marki Fulham og bjargaði sínum mönnum frá mun stærra tapi.

Staðan í ensku úrvalsdeildinni.