Chelsea jafnaði úr umdeildri vítaspyrnu í uppbótartíma

Afar umdeild vítaspyrna í uppbótartíma kom í veg fyrir að West Bromwich Albion yrði fyrsta liðið til að vinna Chelsea á Stamford Bridge í ensku úrvalsdeildinni í tíð Jose Mourinho.

Chelsea og West Bromwich Albion gerðu 2-2 jafntefli á Brúnni í dag en gestirnir voru að vonum svekktir í leikslok enda hársbreidd frá sögulegum sigri.

Ramires fiskaði vítið umdeilda og Eden Hazard skoraði jöfnunarmarkið af miklu öryggi á sjöttu mínútu í uppbótartíma. Vítaspyrnudómurinn er og verður mjög umdeildur.

Chelsea var í mikilli stórsókn allt frá því að WBA-menn komust yir á 68. mínútu en það leit út fyrir að vörnin hjá lærisveinum Steve Clarke ætlaði að halda.

Mourinho var búinn að stýra Chelsea í 65 heimaleikjum í röð í ensku úrvalsdeildinni án þess að tapa. Chelsea hafði unnið 51 þeirra og gert 14 jafntefli. WBA hafði ennfremur ekki unnið Chelsea á útivelli í efstu deild síðan 30. september 1978.

Það varð hinsvegar ekkert að sögulegum úrslitum þökk sé umræddum dómi Andre Marriner sem verður á milli tannanna á áhugafólki um ensku úrvalsdeildina langt fram í næstu viku.

Samuel Eto'o hefur verið duglegur að skora hrægammamörk að undanförnu og hann bætti einu við þegar hann kom Chelsea í 1-0 á lokamínútu fyrri hálfleiksins. Eto'o fyldi þá eftir þegar skot Eden Hazard var varið.

Shane Long jafnaði metin á 61. mínútu með kraftmiklum skalla eftir að Petr Čech varði skalla Gareth McAuley beint upp í loftið. Long var frekastur á frákastið og skallaði boltann í markið.

Petr Čech átti að gera betur þegar hann hleypti í gegn skoti frá Stephane Sessegnon á 68. mínútu.

Chelsea menn var í stórsókn á lokakafla leiksins og settu mikla pressu á gestina og fengu síðan vítið á síðustu andatökum leiksins.

Staðan í ensku úrvalsdeildinni.