Norwich skoraði þrjú mörk í seinni hálfleik

Norwich fagnaði langþráðum sigri í kvöld þegar liðið vann 3-1 heimasigur á West Ham í síðasta leik dagsins í ensku úrvalsdeildinni. Þetta var fyrsti deildarsigur Norwich-liðsins síðan í lok september.

West ham var 1-0 yfir í hálfleik en allt annað Norwich-lið mætti til leiks í þeim síðari þar sem liðið tryggði sér mikilvægan sigur með þremur mörkum.

Norwich vann síðast 1-0 sigur á Stoke City 29. september en liðið var bara búið að fá eitt stig út úr síðustu fjórum leikjum sínum og tapaði 0-7 á móti Manchester City um síðustu helgi.  

Ravel Morrison kom West Ham í 1-0 á 32. mínútu eftir sending Kevin Nolan og þannig var staðan í hálfleik.

Jussi Jääskelainen, markvörður West Ham, fékk á sig klaufalegt víti á 54. mínútu og Gary Hooper jafnaði metin í 1-1.

Robert Snodgrass skoraði síðan flott mark beint úr aukaspyrnu á 72. mínútu og það leit út fyrir að ætla að verða sigurmarkið þar til að Leroy Fer innsiglaði sigurinn í uppbótartíma eftir stoðsendingu frá Snodgrass.

Staðan í ensku úrvalsdeildinni.