Slæmt útivallar gengi Manchester City heldur áfram

Sunderland vann 1-0 seiglusigur á Manchester City á Stadium of Light í dag. Þetta er annar sigur Sunderland í síðustu þremur leikjum og virðast vera að taka við sér eftir að hafa aðeins fengið eitt stig úr fyrstu sjö leikjunum.

Phil Bardsley skoraði eina mark leiksins um miðbik fyrri hálfleiks. Wes Brown átti þá langa sendingu inn fyrir vörn City-manna sem Bardsley tók niður og afgreiddi vel. Góð samvinna hjá fyrrverandi leikmönnum Manchester United.

Þrátt fyrir að Manuel Pellegrini hafi reynt að hrista upp í liði City með sóknarsinnuðum breytingum náðu gestirnir ekki að ógna marki Sunderland verulega og unnu heimamenn að lokum mikilvægan sigur.

Þetta var fjórði tapleikur Manchester City á útivelli á tímabilinu en þeir töpuðu alls fjórum útileikjum á síðasta tímabili. Þeir sitja í sjöunda sæti eftir leikinn en geta misst nágranna sína í Manchester United yfir sig nái rauðu djöflarnir að leggja Arsenal af velli.