Beckham: Get ekki gagnrýnt Ferguson

David Beckham, neitar að gagnrýna Sir Alex Ferguson eftir að ævisaga hans kom út á dögunum. Sir Alex og Beckham unnu náið saman hjá Manchester United þegar leikmaðurinn lék undir hans stjórn.

Beckham var seldur til Real Madrid árið 2003 en á þeim tímapunkti þótti Ferguson að frægðin hefði farið illa í Beckham.

Skotinn vildi meina að leikmaðurinn teldi sig vera orðin stærri en klúbburinn og því var hann seldur frá félaginu.

„Ég get ekki sagt neitt neikvætt um manninn sem gerði mig að því sem ég er í dag,“ sagði Beckham í viðtali á Sky Sports.

„Alex Ferguson er stærsta ástæðan fyrir því að ég get litið stoltur til baka á minn feril. Ég hef spilað með frábærum leikmönnum og hjá góðum liðum. Ég hef unnið 19 titla á mínum ferli, leikið 115 landsleiki fyrir þjóð mína og leitt England út á völlinn á heimsmeistaramóti sem fyrirliði.“