NSA hleraði líka á Spáni

Enn berast fregnir af víðtækri njósnastarfsemi Bandarísku þjóðaröryggisstofnunarinnar en spænskir miðlar fullyrða að stofnunin sem gengur undir nafninu NSA, hafi hlerað rúmlega sextíu milljónir símtala á aðeins einum mánuði á Spáni. Upplýsingarnar koma frá uppljóstraranum Edward Snowden, sem flúði undan bandarískum yfirvöldum og hefur fengið tímabundið hæli í Rússlandi.

NSA safnaði saman símanúmerum og staðsetningu símtalanna, en hlustaði ekki á hvert og eitt símtal, enda væri slíkt ógjörningur. Þetta er svipuð aðferð og komið hefur í ljós að stofnunin hefur beitt í fleiri löndum, á borð við Frakkland og Ítalíu og þá hefur einnig komið í ljós að stofnunin hleraði síma 35 þjóðarleiðtoga um allan heim. Evrópusambandið hefur sett saman rannsóknarnefnd sem nú undirbýr heimsókn til Washington þar sem fundað verður vegna þessara mála.