Íslendingar fundu vel fyrir skjálftanum á Filipseyjum

Ekkert amar að hópi Íslendinga sem er nálægt skjálftasvæðunum á Filipseyjum þar sem óttast er að hátt í eitthundrað manns hafi farist í öflum jarðskjálfta í nótt.

Skjálftinn var mjög öflugur eða 7,2 og reið yfir á miðnætti að íslenskum tíma, eða átta að morgni í dag að þeirra tíma. Tala látinna fer vaxandi og nú er staðfest að 93 hafi farist, en björgunarmenn eru enn að leita í rústum bæja og borga, meðal annars í rústum spítala sem hrundi í Cebu.

Skjálftinn átti upptök sín undir eyjunni Bohol sem er vinsæll ferðamannastaður. Yfirvöld á Filipseyjum segja að flestir hafi farist í borginni Cebu, sem er meðal helstu borga landsins.

Níu starfsmenn Jarðborana eru  á Filipseyjum í jarðhitaverkefnum. Rúnar Þór Jónsson viðskiptaþróunarstjóri Jarðborana er í Manilla, en átta samstarfsmenn hans eru staddir á Navas sem er um 225 kílómetra frá upptökum skjálftans.

„Hann auðvitað átti upptök sín í Cebu og þar varð mikið tjón. En okkar fólk fann hins vegar fyrir skjálftanum á Navas. En mesta tjónið varð í Cebu sem er á næstu eyju við okkur,“ segir Rúnar Þór Jónsson viðskiptaþróunarstjóri Jarðborana á Filipseyjum.

Íslendingarnir segja að skjálftinn hafi staðið yfir í all langa stund og lengur en skjálftar sem þeir hafi fundið á Íslandi. Íslendingarnir voru ýmist staddir á hóteli sínu eða við borinn Geysi sem Jarðboranir eru að setja upp, en framkvæmdir á svæðinu eiga að hefjast á næstu dögum.

„Áhöfn Geysis er í lagi en skjálftinn fannst vel á hótelinu og út við borinn. Svo hafa minni skjálftar verið að finnast af og til eftir þetta,“ segir Rúnar Þór. En ekkert ami af hans fólki og því sé ekki hætta búin.