Torres ekki refsað frekar fyrir klórið

Fernando Torres verður í leikbanni þegar Chelsea mætir Norwich í ensku úrvaldsdeildinni á sunnudaginn.

Torres var rekinn af velli með tvö gul spjöld í 1-1 jafnteflinu gegn Tottenham. Fyrra gula spjaldið fékk hann eftir ósætti við Belgann Jan Verthongen hjá Spurs. Sá spænski virtist klóra þann belgíska.

Enska knattspyrnusambandið vísar í stefnu sambandsins og bendir á að aðstoðardómari hafi séð leikmennina lenda saman. Því sé ekki ástæða til að vísa málinu til frekari skoðunar. Niðurstaðan er því eins leiks bann vegna brottvísunarinnar.

Torres fékk að líta annað gula spjald sitt eftir skallaeinvígi við Verthongen. Belginn lá eftir á jörðinni en ekki var að sjá að Torres hefði sett hönd eða olnboga í hann eins og dómari leiksins taldi. Jose Mourinho, stjóri Chelsea, fór ófögrum orðum um Verthongen í leikslok og sakaði um leikaraskap.