Sá stóri og stæðilegi kveður

Michael Duberry, fyrrum miðvörður Chelsea og Leeds, hefur lagt skóna á hilluna.

Varnarmaðurinn 37 ára var látinn fara frá Oxford United í sumar og hefur undanfarnar vikur spilað með utandeildarliðinu Hendon.

„Ég hef ekkert meira að sanna eða ná frekari árangri. Ég hætti á mínum forsendum með bros á vör,“ segir Duberry í viðtali við BBC. Hann hóf ferilinn hjá Chelsea þar sem hann vann deildabikarinn, Evrópukeppni bikarhafa og Ofurbikar Evrópu.

Duberry spilaði 484 leiki á ferlinum með Chelsea, Bournemouth, Leeds, Stoke, Reading, Wycombe Wanderers, St. Johnstone og Oxford. Hann stefnir á frama í fjölmiðlum og vonast til þess að vera kominn fyrir framan myndavélarnar með hljóðnema á lofti áður en langt um líður.