Rodgers kallar goðsagnir heim á Anfield

Robbie Fowler, Steve McManaman og Rob Jones hafa verið fengnir til þess að koma að þjálfun leikmanna Liverpool í unglingaliðunum.

Skytturnar þrjár, sem spiluðu saman með Liverpool á tíunda áratugnum, eiga að aðstoða við þjálfun strákaliðanna 21 árs og 18 ára og yngri.

„Það er frábært að hafa fengið Robbie, Steve og Rob í lið með sér,“ segir Rodgers við Liverpool Echo. „Ég vildi virkja fleiri fyrrverandi leikmenn og ræddi við nokkra í sumar um mögulegt hlutverk hér.“

Rodgers segir mikilvægt að fá leikmennina því ungu strákarnir líti upp til þeirra. Hlutverk þeirra sé bæði að þjálfa leikmennina í knattspyrnu og leiðbeina á annan hátt.

Norður-Írinn hefur áður lýst yfir áhuga á að fá Jamie Carragher í þjálfarateymi Liverpool. Varnarmaðurinn er orðinn sérfræðingur Sky sjónvarpsstöðvarinnar.