Suarez skoraði og Liverpool á toppinn

Luis Suarez og Daniel Sturridge skoruðu báðir í sannfærandi 3-1 sigri Liverpool á Crystal Palace í ensku úrvalsdeildinni í knattspyrnu í dag.

Heimamenn á Anfield léku á alls oddi í fyrri hálfleik. Suarez skoraði fyrsta markið liggjandi á vellinum eftir undirbúning Jose Enrique. Skömmu síðar fór Sturridge illa með varnarmenn Palace og hamraði boltann neðst í fjærhornið úr þröngu færi.

Áður en fyrri hálfleikur var úti skoraði fyrirliðinn Steven Gerrard úr vítaspyrnu og staða þeirra rauðklæddu góð. Dwight Gayle minnkaði muninn með skalla seint í leiknum en sigur Liverpool var aldrei í hættu.

Með sigrinum komst Liverpool á topp ensku úrvalsdeildarinnar með 16 stig eftir sjö leiki. Liðið hefur aðeins tapað einum leik í deildinni. Arsenal hefur 15 stig og á leik til góða gegn West Brom á morgun. Crystal Palace hefur þrjú stig í 19. sæti deildarinnar.