Wenger hrósaði Wilshere eftir stormasama viku

Arsene Wenger knattspyrnustjóri Arsenal hrósaði karakternum Jack Wilshere eftir að miðjumaðurinn bjargaði stigi fyrir Arsenal á móti West Brom í dag en liðin skildu jöfn 1-1.

Claudio Yacob kom heimamönnum frá Birmingham yfir seint í fyrri hálfleik en Wilshere jafnaði metin í seinni hálfleik og þurftu liðin að sættast á skiptan hlut.

„Hann átti í vandræðum með að komast í takt við leikinn,“ sagði Wenger um hinn 21 árs gamla miðjumann sem lék lengst af á kantinum í dag.

„En hann býr yfir miklum karakter. Hann gefst ekki upp og heldur áfram að leika sinn leik og uppskar frábært mark.

„Það var mikið brotið á honum og hann fékk ekki þær aukaspyrnur sem hann átti skilið,“ sagði Wenger en Wilshere var mikið í fjölmiðlum í vikunni þegar breska slúðurpressan birti myndir af honum með vindling í munnvikunum.

„Heilt yfir þá var jafntefli sanngjörn úrslit en við fengum færi til að skora annað mark síðasta hálftímann.“