Rodgers um Suarez og Sturridge: Ekki til betra framherjapar í deildinni

Brendan Rodgers, knattspyrnustjóri Liverpool, er himinlifandi með framherjaparið sitt Luis Suarez og Daniel Sturridge sem skoruðu mörk liðsins í 3-1 útisigri á Sunderland í ensku úrvalsdeildinni í gærkvöldi.

Daniel Sturridge skoraði eitt mark og lagði síðan upp hin tvö mörkin fyrir Luis Suarez sem var að leika sinn fyrsta leik í ensku úrvalsdeildinni síðan að hann var dæmdur í tíu leikja bann fyrir að bíta Chelsea-manninn Branislav Ivanovic.

„Ég er ekki viss um að það sé til betra framherjapar í ensku úrvalsdeildinni í dag en það hjá Suarez og Sturridge. Þetta eru tveir af bestu framherjum deildarinnar og þeir sýndu það og sönnuðu á móti Sunderland ," sagði Brendan Rodgers í viðtali við BBC.

„Þeir verða líka bara betri með tímanum. Það er auðvelt að sjá að þeir skilja vel  hvorn annan. Við höfum unnið mikið með þá saman á æfingum og þeir líta afar vel út," sagði Rodgers.

„Þetta eru líka ólíkir leikmenn og það er erfitt fyrir varnir mótherjanna að eiga við slíkt. Annar hefur snerpu, kraft og tvo góða fætur en hinn er spriklari sem getur snúið við á augabragði og komið sér inn í teiginn," sagði Rodgers.

Það er hægt að sjá mörkin úr leiknum með því að smella hér fyrir ofan.