City niðurlægði Englandsmeistarana

Manchester City rúllaði fyrir nágrana sína, Englandsmeistara Manchester United, 4-1 í ensku úrvalsdeildinni í dag á heimavelli City. Staðan í hálfleik var 2-0.

Sigurinn var verðskuldaður. City var mikið betri aðilinn í leiknum og komst yfir strax á 16. mínútu. Sergio Agüero afgreiddi boltann glæsilega í netið eftir sendingu Kolarov.

Yaya Toure kom City í 2-0 á síðasta andartaki fyrri hálfleiks og reyndist það rothögg fyrir United því City skoraði tvö mörk á fyrstu fimm mínútum seinni hálfleiks.

Agüero skoraði strax á annarri mínútu og Samir Nasri þremur mínútum síðar og úrslitin ráðin.

Wayne Rooney minnkaði muninn þremur mínútum fyrir leikslok en það var of lítið og of seint.

Manchester City er komið með 10 stig og er í þriðja sæti á hagstæðu markahlutfalli. United er áfram með 7 stig í 8. sæti.