Paulinho hetja Tottenham

Aron Einar Gunnarsson og félagar í Cardiff máttu sætta sig við grátlegt tap, 0-1, gegn Tottenham í ensku úrvalsdeildinni í dag. Það var Brasilíumaðurinn Paulinho sem skoraði sigurmark leiksins í uppbótartíma.

Það skoraði hann með skemmtilegu hælskoti í teignum. Argentínumaðurinn Erik Lamela lagði markið upp en hann kom af bekknum fyrir Gylfa Þór Sigurðsson á 71. mínútu.

Gylfi átti þokkalegan leik og komst nálægt því að skora í seinni hálfleik er hann átti skot í slá. Aron Einar Gunnarsson lék allan leikinn fyrir Cardiff og fékk þeirra besta færi tíu mínútum fyrir leikslok. Skotið var ekki nógu gott og fór yfir.

Tottenham komst með sigrinum í annað sæti deildarinnar en Cardiff er í því sextánda.