Mikið undir hjá David Moyes

Það er við hæfi að Luis Suarez snúi aftur að loknu tíu leikja banni sínu í stærsta leik 3. umferðar deildarbikarsins gegn Manchester United.

Framherji Liverpool má reikna með óblíðum móttökum stuðningsmanna United enda óhætt að segja að framherjinn og Rauðu djöflarnir eigi sér forsögu. Þannig var Suarez dæmdur í leikbann árið 2011 fyrir kynþáttafordóma í garð Patrice Evra, varnarmanns United. Í kjölfarið tókust kapparnir ekki í hendur í næstu heimsókn Liverpool á Anfield.

Brendan Rodgers, stjóri Liverpool, gaf í skyn á blaðamannafundi í gær að Suarez kæmi við sögu í leiknum. Úrúgvæinn mun ferðast með liðinu til Manchester en það mun ekki fást á hreint fyrr en skömmu fyrir leik hvort hann byrji.

Líklegt má telja að Rodgers tefli fram sínu sterkasta mögulega liði á Old Trafford í kvöld. Liverpool er ekki í Evrópukeppni þetta árið og virðist Rodgers leggja áherslu á velgengni í deildabikarnum ef marka má uppstillingu hans í 2. umferðinni gegn Notts County.

Gestirnir frá Merseyside verða án Phillipe Coutinho sem er frá vegna meiðsla auk þess sem varafyrirliðinn Daniel Agger er tæpur. Eftir frábært gengi í upphafi leiktíðar hefur Liverpool fengið eitt stig úr síðustu tveimur leikjum í deildinni. Liðið tapaði óvænt á heimavelli gegn Southampton um helgina.

Pressan á David Moyes, stjóra Manchester United, fyrir leikinn í kvöld er mikil. Moyes mátti horfa upp á risatap gegn grönnunum í City um helgina auk þess sem liðið tapaði 1-0 gegn Liverpool í deildinni á dögunum. Ljóst er að tap á heimavelli gegn erkifjendunum myndi styggja stuðningsmenn United verulega.

Ekki bætir úr skák fyrir heimamenn að Robin van Persie er enn frá keppni vegna meiðsla. Nokkrir leikmenn United hafa hlotið mikla gagnrýni undanfarnar vikur en líklega enginn meiri en kantmaðurinn Ashley Young. Fróðlegt verður að sjá hvort Moyes treysti áfram á Englendinginn eða gefi Japananum Shinji Kagawa langþráð tækifæri.

United og Liverpool hafa ekki mæst í deildabikarnum síðan í úrslitaleiknum fyrir tíu árum. Þá vann Liverpool 2-0 sigur með með mörkum Steven Gerrard og Michael Owen.

Heimamenn ættu að hafa gætur á Daniel Sturridge í leiknum. Landsliðsframherji Englendinga hefur skorað í báðum leikjum sínum með Liverpool gegn United.

Leikur United og Liverpool hefst klukkan 18.45 og verður í beinni útsendingu á Sport 2 & HD.