Bendtner hefur gæði í hæsta flokki

Arsene Wenger, stjóri Arsenal, hefur ekki áhyggjur af sjálfstrausti framherjans Nicklas Bendtner.

Sá danski lagði upp mark Arsenal í 1-1 jafntefli gegn West Brom í deildabikarnum í gærkvöldi. Arsenal fór áfram eftir vítaspyrnukeppni en Bendtner skoraði úr sinni spyrnu.

„Nicklas spilaði heilt yfir vel miðað við hve langt er síðan hann spilaði,“ sagði Wenger í leikslok. Honum fannst framherjinn hávaxni gera vel einn síns liðs í framlínunni í 120 mínútur.

„Hann sýndi Arsenal-hjartað og var duglegur að vinna tilbaka líka,“ sagði franski stjórinn.

Wenger var stoltur af ungu leikmönnum liðsins sem stóðu vaktina í leiknum. Frakkinn hefur alltaf lagt áherslu á að nota deildabikarinn til að gefa minni spámönnum tækifæri.

„Mestu máli skiptir fyrir Bendtner að halda sér í góðu ástandi því hæfileikarnir eru óumdeildir. Ég þekki hann vel. Það er mikilvægt að hann haldi stöðugleika og leggi hart að sér. Gæðin eru í hæsta flokki.“

Arsenal tekur á móti Chelsea í fjórðu umferð keppninnar.