Facebook biðst afsökunar á auglýsingu

Facebook hefur beðist afsökunar á birtingu auglýsingar fyrir stefnumótavef þar sem ljósmynd af Rehtaeh Parsons, 17 ára kanadískri unglingsstúlku sem svipti sig lífi, var notuð.

Parsons var nauðgað af fjórum mönnum þegar hún var 15 ára og fyrirfór sér í apríl á þessu ári eftir að hafa komist að því að gerendurnir höfðu dreift ljósmyndum af árásinni.

Í yfirlýsingu frá Facebook segir að auglýsingin, sem kom frá stefnumótavefnum Ionechat.com, hafi verið gróft brot á reglum samskiptavefsins og hafi verið fjarlægð. Faðir Parsons, Glen Canning, segir auglýsinguna hafa vakið hjá sér viðbjóð en í henni var notendum boðið að kynnast kanadískum stúlkum.

„Ég vil að réttarkerfið refsi þessum drengjum, ekki almenningur,“ sagði móðir Parsons við kanadíska fjölmiðla í apríl og bað hún almenning að láta gerendurna í friði. Þá hótuðu tölvuhakkaranir í Anonymous-hópnum að birta nöfn piltanna opinberlega ef lögreglan rannsakaði ekki málið með sannfærandi hætti.