Wenger: Það fór bara allt úrskeiðis

Það var púað á Arsene Wenger, knattspyrnustjóra Arsenal, í dag eftir 1-3 tap á heimavelli á móti Aston Villa í fyrstu umferð ensku úrvalsdeildarinnar.

Arsenal lék manni færri síðustu 23 mínútur leiksins og tvö fyrstu mörk Aston Villa komu eftir vítaspyrnur. Christian Benteke fylgdi fyrst eftir þegar Wojciech Szczesny varð víti hans en skoraði síðan af öryggi úr seinni vítaspyrnu sinni.

„Við byrjuðum leikinn vel en svo fór bara allt úrskeiðis. Menn meiddust, við fengum á okkur dóma, misstum mann af velli og klúðruðum síðan færum. Þetta var slæmur dagur ekki vegna frammistöðu liðsins heldur öllu því mótlæti sem við lentum í," sagði Arsene Wenger.

„Það er ekki mitt starf að tala um dómarann því ég þarf að hugsa um mitt lið. Það sem særir mig er að valda fólki vonbrigðum sem elskar þennan klúbb. Ég er hér til þess að reyna að gleðja fólk og það eina sem ég get gert núna er að biðjast afsökunar á þessum leik og reyna að gleðja þau í staðinn í næsta leik," sagði Wenger.

„Við gátum unnið þennan leik með þessum leikmönnum. Ég er sannfærður um það," sagði Arsene Wenger sem hefur verið gagnrýndur harðlega fyrir að styrkja ekki liðið sitt. Á pöllunum sáust líka skilaboð eins og "Eyða, eyða, eyða."