Fékk að kenna á hestunum

Færa þurfti starfsmann í öryggisgæslu á spítala að loknum deildabikarleik grannliðanna Preston North End og Blackpool í gærkvöldi.

Heimamenn í Preston, sem leika í c-deild, skoruðu sigurmarkið undir lok leiksins. Stuðningsmenn þeirra ærðust og hundruð þeirra hljópu inn á völlinn í sigurvímu.

Starfsmenn í öryggisgæslu reyndu að hafa hemil á lýðnum og lögreglumenn, margir hverjir á hestbaki, bættust í hópinn. Einn öryggisvarðanna varð hins vegar fyrir því óláni að lögregluhestur hljóp utan í hann. Ekki bættist lán hans sekúndum síðar þegar annar hestur gekk yfir hann.

Færa þurfti hinn slasaða á sjúkahús vegna meiðsla á öxl. Þarf fór hann í röntgenmyndatöku og eru niðurstöður úr henni væntanlegar.

Paul Ince, stjóri Blackpool sem leikur í b-deildinni, var afar ósáttur með öryggisgæslu á Deap Dale í gær í samtali við BBC.

„Við höfum séð stuðningsmann kýla markvörð og aðra leikmenn fá að kenna á því. Hvenær ætlum við að læra af þessu,“ sagði Ince. Hann sagði ótrúlegt til þess að vita að líklega yrði ekkert tekið á málunum fyrr en einhver yrði stunginn af óboðnum gesti.