Zaha vill freista gæfunnar hjá United

Sóknarmaðurinn Wilfried Zaha hjá Manchester United hefur ekki áhuga á því að spila sem lánsmaður hjá öðru liði á næsta keppnistímabili.

Zaha skoraði sitt fyrsta mark fyrir United í gær er liðið gerði 2-2 jafntefli við Cerezo Osaka í æfingaleik í gær. Hann ætlar að berjast fyrir sæti í byrjunarliðinu í vetur.

„Markmið mitt fyrir tímabilið er að fá eins margar mínútur og ég get. Ég vil ekki fara neitt annað heldur spila hér þegar ég fæ tækifærið,“ sagði Zaha.

„Þetta er áhætta en ég er viljugur að taka hana. Ég naut þess að spila með Crystal Palace en ég er leikmaður Manchester United í dag. Hér eru stærri nöfn en ég og því verð ég ánægður með þær mínútur sem ég fæ.“

David Moyes, stjóri United, er ánægður með framlag Zaha. „Hann er nokkuð þögull enn sem komið er því hann er enn að kynnast öllum. En hann hefur haft áhrif á leikina okkar.“