Líf sýrlenskra barna eyðilagt

Hætt er við því að þegar sýrlensk börn vaxa úr grasi verði þau bæði ólæs og full af reiði og jafnvel heift vegna stríðsátakanna, sem lagt hafa líf þeirra í rúst.

Þetta segir Leila Zerrougui, fulltrúi Sameinuðu þjóðanna gagnvart börnum og stríðsátökum, sem nú er komin til Beirút í Líbanon eftir þriggja daga heimsókn til Sýrlands.

Hún sat þar í dag sameiginlegan fund með embættismönnum og leiðtogum stjórnarandstöðunnar.

Þegar stríðinu lýkur, segir Zerrougui, þá „þurfið þið að takast á við heila kynslóð barna sem hafa misst af bernsku sinni, sem verða bæði full haturs og ólæs.”

Borgarastríðið í Sýrlandi hefur staðið yfir í meira en tvö ár. Átökin hafa lagt fjölmarga skóla í rúst, en þeir sem enn standa eru margir notaðir sem húsaskjól fyrir flóttafólk.

Zerrougui hefur undanfarið heimsótt flóttamannabúðir í nágrannalöndum Sýrlands, Líbanon, Jórdaníu, Tyrklandi og Írak.

Hjálparsamtök segja að meira en tvær milljónir barna í Sýrlandi líði nú næringarskort og sjúkdóma af ýmsu tagi. Þau hafi orðið fyrir miklu áfalli og ofan á allt saman hefur sumum þeirra verið þröngvað í hjónabönd allt of ungum.

Stríðsátökin hafa kostað meira en sjö þúsund börn lífið, en alls hafa meira en 93 þúsund manns látist í þessum hildarleik sem hófst í mars árið 2011 með friðsamlegum mótmælum.