Var tæklingin verri en hrindingin?

Það var hiti í mönnum á Akranesi í gær þegar Þór vann afar dramatískan 1-2 sigur á ÍA. Einu rauðu spjaldi var svo lyft í leiknum og margir vildu sjá annað rautt fara á loft.

Það fékk Skagamaðurinn Jóhannes Karl Guðjónsson fyrir að hrinda Þórsaranum Ármanni Pétri Ævarssyni. Jóhannes var mjög æstur eftir slæma tæklingu Ármanns sem slapp með gult spjald fyrir tæklinguna.

"Tæklingin hjá Ármanni er rosalega gróf. Hann er bara að þruma niður aftan frá. Mér fannst það verðskulda jafnvel rautt spjald en mér finnst alveg klárt að Jói Kalli átti að fá rauða spjaldið," sagði Tómas Ingi Tómasson í Pepsimörkunum í gær.

Hjörvar Hafliðason var ekki sammála félaga sínum.

"Má ekki ýta svona í öxlina á öðrum fullorðnum karlmanni? Þetta er fáranlegt," sagði Hjörvar.

Dæmi hver fyrir sig en þetta atvik má sjá hér að ofan.