Enski boltinn

Mkhitaryan hafnaði Liverpool og Tottenham

Eiríkur Stefán Ásgeirsson skrifar
Nordic Photos / Getty Images

Armeninn Henrikh Mkhitaryan virðist vera á góðri leið með að ganga til liðs við Dortmund í Þýskalandi en hann var einnig eftirsóttur af enskum liðum.

Undanfarið hefur verið greint frá því að Liverpool hafi áhuga á kappanum en enska blaðið Independent segir að Tottenham hafi einnig verið á höttunum á eftir Mkhitaryan, sem sló í gegn með Shakhtar Donetsk í Úkraínu á liðnu tímabili.

Mkhitaryan mun hins vegar hafa hafnað báðum liðum þar sem hann er ólmur í að spila með Dortmund í Meistaradeild Evrópu á næsta tímabili.

Shakhtar vill fá 30 milljónir evra fyrir kappann en samkvæmt þýskum fjölmiðlum eru forráðamenn Dortmund aðeins reiðubúnir að greiða 23 milljónir.

Mkhitaryan virðist afar áhugasamur um að fara frá Shakhtar en hann var fjarverandi þegar að undirbúningstímabilið hófst hjá liðinu.

Hann hefur orðið meistari með Shakhtar undanfarin þrjú ár og var frábær á síðasta tímabili er hann skoraði 25 mörk og lagði upp tíu til viðbótar í 25 leikjum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.