Þetta gerðist í 1. umferð Pepsi-deildar karla

Brynjar Björn Gunnarsson meiddist, Finnur sá rautt, Valgeir veifaði gulu spjöldunum og David James hélt hreinu. Það var um nóg að vera í 1. umferð Pepsi-deildar karla.

Meiðsli

Brynjar Björn Gunnarsson spilaði sinn fyrsta leik í efstu deild með KR í 16 ár. Hann kom KR á bragðið gegn Stjörnumönnum en þurfti að fara af velli undir lok fyrri hálfleiks vegna meiðsla aftan í læri.

Rauða spjaldið

Rauði baróninn Garðar Örn Hinriksson stóð undir nafni þegar hann vísaði Finni Ólafssyni af velli í viðureign Fylkis og Vals í Árbænum. Brottvísunin breytti gangi mála í leiknum og Valsmenn nýttu sér liðsmuninn.

Enginn vafi lék á refsingu Finns sem varði með hendi á marklínu. Miðjumaðurinn verður því í banni gegn Fram á Laugardalsvelli á mánudagskvöldið.

Spjaldagleði í Kópavogi

Skagamaðurinn Valgeir Valgeirsson þurfti átta sinnum að taka upp skrifblokkina og pennann í viðureign Breiðabliks og Þórs til að spjald menn. Átta fóru í bókina en spjöldin dreifðust jafnt á liðin tvö.

Mark umferðarinnar

Haukur Páll Sigurðsson skoraði sigurmark Valsmanna á Árbæjarvelli. Segja má að markið hafi verið úr smiðju Paul Scholes en miðjumaðurinn smellhitti boltann fyrir utan teig. Boltinn söng neðst í markhorninu og sætur sigur Valsmanna staðreynd fyrir vikið.

Ummæli

Jóhann Birnir Guðmundsson leikmaður Keflavíkur var svekktur með tap sinna manna gegn Íslandsmeisturum FH í Krikanum. Kantmaðurinn sagði í viðtali að leik loknum að líklega væri búið að spá Keflavík falli níu af síðustu tíu tímabilum hans í Bítlabænum.

„Við spilum hundrað leiki í höllinni og mætir aldrei neinn að horfa á okkur. Þið vitið aldrei neitt um okkur, spyrjið daginn fyrir leik hverjir spila í liðinu, þetta er fáránlegt," sagði Jóhann Birnir við Fótbolti.net.

Frumsýning helgarinnar

Víkingur í Ólafsvík bauð til frumsýningarveislu en gleðin endaði ekki á besta hátt enda keyrðu Framarar til Reykjavíkur með stigin þrjú í skottinu. David James stóð hins vegar fyrir sínu í fyrsta leiknum með ÍBV og var eini markvörðurinn í umferðinni sem hélt marki sínu hreinu.

Heppni umferðarinnar

Halldór Orri Björnsson, leikmaður Stjörnunnar, var stálheppinn að fjúka ekki af velli í fyrri hálfleik gegn KR. Fyrst átti hann ljóta tæklingu sem fékk réttilega gult spjald og skömmu síðar handlék hann knöttinn viljandi á miðjum vellinum. Magnús Þórisson, dómari leiksins, gaf Halldóri einn séns í viðbót og getur Stjörnumaðurinn verið sáttur með gjöfina.

Vafamál umferðarinnar

Brynjar Björn Gunnarsson kom KR-ingum á bragðið á Stjörnuvelli í gær. Engin leið var að sjá hvort boltinn hefði farið inn fyrir marklínu KR-inga. Aðstoðardómarinn hafði þó best sjónarhorn allra og taldi boltann inni.

Besta mæting

2614 áhorfendur mættu á stórleikinn í Vesturbænum í gærkvöldi. Fæstir mættu í frumsýningarveisluna í Ólafsvík þar sem 705 sáu leik Víkinga og Framara.

Sportið á Vísi er komið á Facebook. Fylgstu með.