„Traustið er stórskemmt“

Justin King, forstjóri bresku verslanakeðjunnar Sainsbury's, segir verslunarlandslagið gjörbreytt eftir hrossakjötshneykslið.

„Traustið er stórskemmt," segir King, og segir hneykslið hafa afhjúpað veikleika í matariðnaðinum sem verði að bæta með hraði.

Undir þetta taka forstjórar verslanakeðjanna The Co-operative Group og Asda, en sala á grænmetisfæði og gervikjöti í verslunum þeirra hefur tekið kipp upp á við í kjölfar hneykslisins.

Sainsbury's er þriðja stærsta verslanakeðja Bretlands á eftir Tesco og Asda, en ólíkt keppinautunum hefur ekki fundist hrossakjöt í vörum Sainsbury's.

King vísar því alfarið á bug að hneykslið sé tilkomið vegna þrýstings stóru keðjanna á heildsala að halda verði niðri. Landssamband nautgripabænda hefur ásakað verslanir um skammsýni og eineltistilburði við bændur.

„Sumir halda því fram að verslanakeðjur þvingi bændur til að spara í gæðaeftirliti. Ég get allavega fullyrt að í tilfelli Sainsbury's er raunin önnur."