Ætlar í baráttu við Gmail

Tölvurisinn Microsoft er svo fullviss um að fyrirtækið hafi upp á bestu tölvupóstsþjónustuna að bjóða að það ætlar að verja tæpum fjórum milljörðum króna í að koma skilaboðunum á framfæri vestanhafs.

Ballið byrjar í dag þegar tölvupóstsþjónusta Microsoft, Outlook, hefur auglýsingaherferð sína. Um leið verða allir notendur Hotmail og MSN, sem einnig eru í eigu Microsoft, færðir yfir til Outlook. Geri notendur það ekki að eigin frumkvæði gerist það sjálfkrafa fyrir sumarlok.

Hörð barátta er á tölvupóstsmarkaðnum vegna þess hve reglulega notendur athuga hvort eitthvað hafi borist í innhólf sín. Það gerir þjónustuaðilum kleift að fylgjast með notendum sínum og safna upplýsingum um þá sem er lykilatriðið þegar kemur að auglýsingasölu. Vefsíður um allan heim reka sig fyrst og fremst á formi auglýsingasölu.

Microsoft hefur nú opnað vefsíðuna Outlook.com sem hefur verið í vinnslu frá því í júlí 2012. Nýja síðan verður í forgrunni auglýsinga í sjónvarpi, útvarpi, á veggspjöldum og á strætisvögnum um öll Bandaríkin. Talið er að Microsoft muni verja á bilinu 4-12 milljarða króna næstu þrjá mánuðu í herferð sína.

Á sama tíma mun Microsoft birta aðrar auglýsingar þar sem ófögrum orðum er farið um keppinautinn, Gmail. Þar segir að tölvupóstsþjónustan, sú vinsælasta í heimi sem stendur, skanni einfaldlega tölvupósta notenda til þess að geta snarað út auglýsingum tengdum efni póstanna.

„Við erum að reyna að ná til fólks sem er orðið latt og sátt við tölvupóstsþjónustu sem er alls ekki það góð og sýna því hvað við getum gert fyrir það," segir Dharmesh Mehta einn af forsvarsmönnum Outlook.

Gmail er vinsælasta tölvupóstsþjónustan í heiminum í dag þótt tölur um notendafjölda séu á reiki. Að eigin sögn eru 425 milljón notenda en í úttekt comScore, sem telur ekki farsímanotendur með, eru notendur sagðir 306 milljón talsins. Næst kemur Yahoo með 293 milljón og Hotmail með 267 milljón notendur.

Nánar um málið hér.