iPhone þakinn demöntum, 200 grímur af drottningunni og lifandi grís gleymdust

Hann er furðulegur listinn yfir þá hluti sem hótelgestir í Bretlandi skildu eftir á herbergjum sínum á síðasta ári.

Travelodge-hótelkeðjan sem rekur um 530 hótel víðsvegar um Bretland hefur gefið út lista yfir nokkra hluti sem urðu eftir á herbergjum gesta sinna. Til að mynda fundust brjóstapúðar, lifandi grís, og upprunalegi töfrasprotinn sem notaður var í Harry Potter-myndunum.

Þá fundust einnig happdrættismiði, sem á var stór vinningur, karfa full af kröbbum og iPhone-sími sem þakinn var demöntum. „Við fundum einnig lykla af Bugatti, handrit af þekktri breskri sápuóperu, og kassa með um 200 grímum af Elísabetu Bretlandsdrottningu," segir Shakila Ahmed, talsmaður hótelkeðjunnar.

Á einu herberginu skildu gestir brúnkusprey-klefa eftir, en klefinn var um tveir og hálfur metri á hæð.

Yfir 20 þúsund bækur voru skildar eftir á hótelherbergjunum, en af þeim voru um 7 þúsund eintök af metsölubókinni Fifty Shades of Grey.