James og Hermann spila bæði með ÍBV og Portsmouth í kvöld

Eyjamenn mæta Portsmouth á Fratton Park í kvöld í góðgerðaleik til styrktar Portsmouth en þetta fornfræga félag hefur verið í miklum peningavandræðum síðustu misseri. Hermann Hreiðarsson, núverandi þjálfari ÍBV og fyrrum leikmaður Portsmouth, kom með þá hugmynd að spila þennan leik en ÍBV-liðið er einmitt í æfingaferð á Englandi.

Hermann og Eyjamenn sáu til þess að Portsmouth þarf ekki að leggja út fyrir neinum kostnaði í tengslum við leikinn nema þá að hýsa leikinn á Fratton Park.

Á eyjamenn.com kemur fram að það hafi verið búið að selja sjö þúsund miða á leikinn í morgun og að vonir standi til þess að nokkur þúsund miðar seljist til viðbótar í dag. Allur ágóði af leiknum rennur í að styrkja slæma fjárhagsstöðu Portsmouth.

David James mun leika sinn fyrsta leik með ÍBV í kvöld og þá ætlar Hermann Hreiðarsson þjálfari liðsins að spila í vörninni. Það kom einnig fram á Sky í gær að James og Hermann munu leika síðustu tuttugu mínútur leiksins með gömlu félögunum í Portsmouth.

Leikurinn hefst klukkan 19.45 að breskum tíma eða 18.45 á íslenskum tíma. Það kostar tíu pund á leikinn fyrir fullorðna, eldri borgarar og yngra fólk (17 til 22 ára) greiðir fimm pund en krakkar undir 17 ára þurfa bara að borga eitt pund.

Portsmouth gefur líka út glæsilega 24 síðna leikskrá í tengslum við leikinn þar sem aðalviðtalið er við Hermann Hreiðarsson. Blaðið kostar bara eitt pund en ágóðinn af því fer á sama stað og ágóðinn af sölu miða á leikinn.