Holloway reyndi að fá Zaha aftur yfir til Palace í sumar

Ian Holloway, knattspyrnustjóri Crystal Palace, hefur nú viðurkennt að hafa reynt að fá Wilfried Zaha yfir til félagsins á láni frá Manchester United í sumar.

Þessi 20 ára framherji yfirgaf Palace í janúar á þessu ári og gekk í raðir Manchester United en hann lék samt sem áður með Palace út leiktíðina.

Zaha lék mikið með Englandsmeisturunum í sumar en hefur ekki enn fengið að spreyta sig með liðinu í ensku úrvalsdeildinni. Því vildi Holloway fá leikmanninn á ný til félagsins á láni.

„Ég spurðist fyrir um leikmanninn á lokadegi félagaskiptagluggans en það gekk ekki upp,“ sagði Holloway.

Crystal Palace mætir Manchester United í ensku úrvalsdeildinni á morgun og hefst leikurinn klukkan 11:45 og verður í beinni útsending á Stöð2 Sport2.