Tim Krul hetja Newcastle á White Hart Lane

Tim Krul var maður leiksins í 1-0 sigri Newcastle á Tottenham á White Hart Lane í ensku úrvalsdeildinni í dag. Krul átti margar stórbrotnar markvörslur frá leikmönnum Tottenham.

Gestirnir byrjuðu leikinn betur og náðu sanngjarnt forskotinu á þrettándu mínútu þegar Loic Remy lék á Brad Friedel í markinu hjá Tottenham og renndi boltanum í netið.

Gylfi Þór Sigurðsson var í byrjunarliði Tottenham í leiknum og spilaði tæplega sjötíu mínútur í dag. Þrátt fyrir margar góðar tilraunir heimamanna átti Tim Krul stórleik í markinu hjá Newcastle og hélt markinu hreinu.

Tottenham gat komist í annað sæti ensku úrvalsdeildarinnar með sigri en sitja í sjötta sæti eftir tapið. Með sigrinum fara Newcastle upp í níunda sæti við hlið Manchester United með 17 stig eftir ellefu leiki.