Cardiff vann baráttuna um Wales

Steven Caulker var hetja Cardiff sem lagði Swansea 1-0 í ensku úrvalsdeildinni í fótbolta í dag. Caulker skoraði sigurmarkið með skalla eftir hornspyrnu Craig Bellamy.

Það var markahlaust í hálfleik en eftir að Aron Einar Gunnarsson kom inn á sem varamaður á 54. mínútu fóru hlutirnir að gerast. Átta mínútum síðar skoraði Caulker eina mark leiksins og tryggði Cardiff mikilvægan sigur í nágránaslagnum í Wales.

Fyrri hálfleikur var bragðdaufur en allt annað var uppi á teningnum í seinni hálfleik. Bæði lið fengu færi til að skora og í uppbótartíma fékk Michel Vorm markvörður Swansea að líta rauða spjaldið og Ángel Rangel, varnarmaður liðsins, þurfti að fara í markið.

Cardiff lyfti sér með sigrinum upp fyrir Swansea í 12. sæti. Cardiff er með 12 stig en Swansea 11 eftir tíu umferðir.