Arteta hrósar Luis Suarez

Mikel Arteta, fyrirliði Arsenal, hrósar Luis Suarez, framherja Liverpool, fyrir það hversu Úrúgvæmaðurinn hefur komið sterkur til baka eftir að hafa tekið út tíu leikja bann. Arsenal tekur á móti Liverpool í ensku úrvalsdeildinni á morgun.

Luis Suarez hefur skorað sex mörk í fyrstu fjórum deildarleikjum sínum á þessu tímabili en hann var mikið í sviðsljósinu fyrir lok félagsskiptagluggans þegar hann sóttist eftir því að vera seldur til Arsenal.

„Hann er æðislegur leikmaður og hefur líka sýnt mikinn karakter að koma svona öflugur til baka eftir alla þessa gagnrýni og allar þessar forsíðufréttir," sagði Mikel Arteta við Daily Mirror.

„Hann hefur átt nokkrar frábærar frammistöður og markatölfræði hans er ótrúleg. Þetta var samt örugglega mjög erfitt fyrir hann því það voru margir á móti honum og það var rosaleg pressa á honum," sagði Arteta.

„Síðasta sumar héldu allir að hann væri að fara en hann kom samt svona öflugur til baka og hefur spilað frábærlega. Ég er hrifinn af svona leikmönnum sem geta staðið upp og sannað sig þegar allir eru á bakinu á þeim," sagði Arteta.

Luis Suarez hefur skorað 29 mörk í 37 deildarleikjum undanfarin tvö tímabil eftir að hafa skorað "bara" 15 mörk í 44 leikjum fyrstu tvö tímabil sín á Anfield.

Það er hægt að sjá svipmyndir af frammistöðu Luis Suarez um síðustu helgi með því að smella hér fyrir ofan.