Pistill Robbie Savage: United nær ekki Meistaradeildarsæti

Robbie Savage, fyrrum leikmaður unglingaliðs Manchester United og atvinnumaður með Leicester, Birmingham og Blackburn, er nú pistlahöfundur hjá Daily Mirror og hann tjáir sig um gengi Manchester United í nýjasta pistli sínum.

„United mun ekki ná einu af fjórum efstu sætunum af því að mótherjar þeirra óttast það ekki lengur að spila á Old Trafford," skrifar Robbie Savage í pistli sínum.

Manchester United fékk bara eitt stig út úr heimaleikjum á móti West Bromwich Albion og Southampton á dögunum og vann síðan nauman heimasigur á Stoke um síðustu helgi eftir að hafa lent tvisvar undir í leiknum.

„Mótherjarnir eru ekki hræddir lengur. Hér áður fyrr stóðu menn í leikmannagöngunum við lið stóru nafanna í United-liðinu og þá var leikurinn oft tapaður fyrir fram. Svo er ekki lengur," skrifar Savage.

Robbie Savage hrósar framherjunum Wayne Rooney og Robin van Persie en gagnrýnir það að leikstíllinn henti þeim ekki nógu vel.

„Þeir eru frábærir leikmenn en vantar bara þjónustuna. United-liðið spilar ekki nógu hraðan bolta og þarfnast fyrst og fremst hraðara tempó í sinn leik," skrifar Savage og lýsir því seinna yfir að Liverpool-mennirnir Daniel Sturridge og Luis Suarez séu besta framherjapar deildarinnar.