Joe Hart búinn að missa sætið sitt í City-liðinu

Joe Hart, markvörður enska landsliðsins, verður ekki í byrjunarliði Manchester City sem mætir Norwich City í ensku úrvalsdeildinni á morgun en þetta hefur enska blaðið Daily Telegraph eftir heimildarmönnum sínum.

Joe Hart gerði afar klaufaleg mistök ásamt varnarmanninum Matija Nastasic þegar Fernando Torres skoraði sigurmark Chelsea á móti Manchester City um síðustu helgi.

Daily Telegraph hefur heimildir fyrir því að Costel Pantilimon verði í markinu á morgun en knattspyrnustjórinn  Manuel Pellegrini vildi ekki gefa neitt upp um markvarðarstöðuna á blaðamannafundi í dag.

Joe Hart hélt City-markinu síðast hreinu í ensku úrvalsdeildinni í markalausu jafntefli á móti Stoke City um miðjan september en hefur síðan fengið mark á sig í fimm leikjum í röð samtals átta mörk.

Nú er að sjá hvort að það komi upp Iker Casillas staða hjá enska landsliðinu en Casillas hefur haldið stöðu sínum í marki spænska landsliðsins þrátt fyrir að vera ekki lengur aðalmarkvörður Real Madrid.

Joe Hart var á bekknum þegar Manchester City hélt hreinu í 120 mínútur í 2-0 sigri á Newcastle í enska deildabikarnum í vikunni. Costel Pantilimon hefur spilað tvo leiki í deildabikarnum og haldið hreinu í þeim báðum.