Liverpool óttast að Lucas verði frá í tvo mánuði

Lucas Leiva, brasilíski miðjumaðurinn í liði Liverpool, haltraði útaf eftir aðeins fimm mínútur í stórleiknum á móti Manchester City um síðustu helgi og svo gæti farið að kappinn spilaði ekkert aftur fyrr en í nóvember.

Lucas er tognaður aftan í læri en hann er að koma til baka eftir að hafa slitið krossband í desember í fyrra. Hann fann fyrst fyrir meiðslunum í upphitun og var fljótur að skipta sér útaf þegar meiðslin ágerðust í upphafi leiksins.

Hinn 25 ára gamli Lucas þarf nú að ganga undir frekari rannsóknir en rifinn vöðvi í læri þýðir fjarveru á bilinu sex til tíu vikur.

Nuri Sahin, nýr lánsmaður frá Real Madrid, kemur því líklega beint inn í liðið fyrir leikinn á móti Arsenal á Anfield á sunnudaginn.