Manchester City að landa 19 ára serbneskum varnarmanni

Það hefur ekki gengið alltof vel hjá Englandsmeisturum Manchester City að styrkja varnarlínu sína í sumar þrátt fyrir að félagið hafi sýnt mörgum þekktum miðvörðum áhuga en nú lítur út fyrir að liðstyrkurinn komi frá Serbíu.

Guardian segir frá því að Manchester City sé langt komið með að ganga frá kaupum á Matija Nastasic, 19 ára serbneskum landsliðsmanni hjá Fiorentina. Manchester City mun væntanlega borga 12 milljónir punda fyrir leikmanninn og senda Stefan Savic með í kaupbæti.

Stefan Savic er 21 ára Svartfellingur og hefur ekki staðist væntingar hjá Manchester City síðan að hann kom til félagsins frá Partizan. Hann spilaði 11 leiki í ensku úrvalsdeildinni á síðustu leiktíð.

Matija Nastasic er fæddur árið 1993 og spilaði 25 leiki með Fiorentina í ítölsku A-deildinni á síðustu leiktíð. Hann er þegar búinn að spila einn leik á þessu tímabili því hann hjálpaði Fiorentina að vinna 2-1 sigur á Udinese í fyrstu umferðinni.