Sky Sports: AC Milan að koma Bendtner til bjargar

Sky Sports hefur heimildir fyrir því að danski landsliðsframherjinn Nicklas Bendtner sé á leiðinni til ítalska liðsins AC Milan. AC Milan er að leita sér að framherja í staðinn fyrir Zlatan Ibrahimovic og Bendtner á enga framtíð hjá Arsenal.

Bendtner hefur ekki fundið sér nýtt lið og telst því enn leikmaður Arsenal. Hingað til hefur ekkert félag verið tilbúið að borga það sem Arsenal vill fá fyrir þennan 24 ára danska landsliðsframherja og Ekstra Bladet taldi mestar líkur á því að hann verði lánaður. Fréttirnar af áhuga AC Milan ætti hinsvegar að gleðja danska landsliðsframherjanna sem hefur sjálfur talað um áhuga evrópska stórliða á sér.

Fulham, West Ham og Aston Villa hafa öll áhuga á því að fá Nicklas Bendtner á láni á þessarri leiktíð en hann var í láni hjá Sunderland á síðasta tímabili. Ekstra Bladet telur 60 prósent líkur á því að Bendtner verði lánaður en aðeins 39 prósent líkur á því að hann verði seldur áður en félagsskiptaglugginn lokar á miðnætti á föstudaginn.

Bendtner dvelur því áfram í London. Hann á enn tvö ár eftir af samningi sínum við Arsenal en bæði hann og Arsene Wenger hafa gefið það út að Daninn sé búinn að spila sinn síðasta leik fyrir félagið.

Nicklas Bendtner var með 8 mörk og 5 stoðsendingar í 29 leikjum með Sunderland í ensku úrvalsdeildinni á síðustu leiktíð en var bara með 2 mörk í 17 leikjum með Arsenal tímabilið á undan.